МОЛИТВА КО ПРЕСВЯТОЙ БОГОРОДИЦЕ, ЧТОМАЯ В ВОСКРЕСЕНЬЕ

МОЛИТВА КО ПРЕСВЯТОЙ БОГОРОДИЦЕ, ЧТОМАЯ В ВОСКРЕСЕНЬЕ
Всемилостивая Дево Богородице, Мати щедрот и человеколюбия, прелюбезная надеждо и упование мое! О, Мати пресладкаго, превожделеннаго и всяку любы превосходящаго Спасителя Иисуса Христа, человеколюбца и Бога моего, Свете помраченныя души моея!
К Тебе аз многогрешный и безнадежный припадаю,Тебе молюся, Источнице Милосердия, Дево Марие яже бездну милосердия и пучину щедрот и человеколюбия родшая; помилуй мя, помилуй мя вопию ти болезненно, помилуй всего уязвленнаго, в лютыя разбойники впадшаго, и от одежды, в ню же облече мя Отец, увы мне, обнаженнаго, Тем и лежу наг всякаго благотворения, возсмердеша и согниша раны моя от лица безумия моего. Владычице моя, Богородице, молю Тя смиренно, воззри на мя милостивым Твоим оком и не возгнушайся мене всего,помраченнаго, всего оскверненнаго, всего в тине сластей погруженнаго, люте падшаго и возстати не могущаго. Умилосердися убо на мя и даждь ми руку помощи, воздвигни мя из глубины греховныя о, Радосте моя! Избави мя от обышедших мя; просвети лице Твое на раба Твоего, спаси погибающаго, очисти оскверненнаго, возстави падшаго люте: можеши бо вся, яко сущи Мати Бога всемогущаго. Излей на мя елей милосердия Твоего, и вино умиления точити ми подаждь: Тебе бо воистину едину надежду стяжах в животе моем: не отрини убо мене к Тебе притекающаго, но виждь скорбь мою, Дево, и души желание, и сие приими и спаси мя, Ходатаице спасения моего. Аминь.